العودة   منتديات المصطبة > الطريق إلى الله > القسم الإسلامى العام

القسم الإسلامى العام خاص بالمواضيع الإسلامية العامة المكتوبة التى لا تحتوى على صوتيات ومرئيات دينية

الصراط المستقيم

كاتب الموضوع: الزهرة البريئة، فى قسم: القسم الإسلامى العام


1 
الزهرة البريئة

يعني ايه هداية ؟؟...الهداية 3 أنواع
أول واحدة هداية اسمها: هداية الإرشاد
يعني ايه ؟؟
مثلا واحد جاي يقولك مثلا هو الشارع الفلاني أروحه ازاي
هتوصفله امشي يمين بعدين خش شمال

إياك تدخل الشارع دا هتمشي غلط

هي دي يا شباب هداية الإرشاد



و ربنا سبحانه و تعالى قال لسيدنا محمد صلى الله عليه وسلم

وَإِنَّكَ لَتَهْدِي إِلَىٰ صِرَاطٍ مُّسْتَقِيمٍ
﴿الشورى: ٥٢﴾


لذلك لازم تبقى متيقن ان طريق النبي صلى الله عليه وسلم

هو الطريق الصح

ما ينفعش تحود يمين أو شمال

هو طريق واحد هتمشي عليه في الدنيا هتمشي صح على الطريق المستقيم

لازم تتبعه هو و بس

مش الممثل الفلاني و لا الممثلة الفلانية و الله هيكونوا أول من يتبرأ منك يوم القيامة

لكن النبي صلى الله عليه وسلم هيشفع لنا و يبقى همه أمته

إوعى تخسر اللحظة اللي هتقابل النبي صلى الله عليه وسلم على الحوض و بدل ما تشرب من يده الشريفة يقولك سحقا سحقا لمن غير بعدي

ناوي تكون مع أي فريق ؟؟

و من رحمة ربنا بعباده انه أنزل الرسل و الكتب السماوية عشان احنا نبقى عارفين نمشي ازاي

و هي دي هداية الإرشاد

التعاليم اللي جت في القرآن و السنة الصحيحة

الأوامر و النواهي

قال تعالى :

وَمَا كَانَ اللَّـهُ لِيُضِلَّ قَوْمًا بَعْدَ إِذْ هَدَاهُمْ حَتَّىٰ يُبَيِّنَ لَهُم مَّا يَتَّقُونَ إِنَّ اللَّـهَ بِكُلِّ شَيْءٍ عَلِيمٌ ﴿التوبة: ١١٥﴾

خلاص مالناش حجة !



النوع التاني من الهداية

هي هداية التوفيق

و القادر على هذه الهداية هو الله جل و علا

قال تعالى :

إِنَّكَ لَا تَهْدِي مَنْ أَحْبَبْتَ وَلَـٰكِنَّ اللَّـهَ يَهْدِي مَن يَشَاءُ وَهُوَ أَعْلَمُ بِالْمُهْتَدِينَ ﴿القصص: ٥٦﴾

و هداية التوفيق يعني أن يشرح الله صدرك للحق

في ناس مهما تقعد تكلمهم و تقولهم كذا حرام و ما ينفعش

ما يقتنعوش

ناخد مثال : البنات اللي بترقق حواجبها مثلا تقولها حرام النبي صلى الله عليه وسلم لعن النامصة و المتنمصة و برضه تقول شكلي و مظهري دا تنضيف بس و تجادل في الحق

و في بنت تانية تسمع أمر ربها توقف على طول

دا لأن ربنا سبحانه و تعالى هداها ( هداية التوفيق )

شرح صدرها للحق

حاجة كمان لازم نتعلمها من المعنى دا انك اذا على الحق و معاك دليل صحيح و بتحاول تقنع اللي قدامك بيه و ما اقتنعش

دا لا يعني فشلك و لكن لم يهده الله

و أيضا اذا اهتدى حد بكلامك فلازم تكون متيقن انك انت سبب بس في الهداية و ان دا أمر من الملك أن شرح صدره إلى الحق

الدليل على الكلام دا ان حتى عم النبي صلى الله عليه وسلم أبو طالب لم يدخل الإسلام

الهداية دي في يد الملك فقط



النوع التالت من الهداية

هي الهداية على الصراط المستقيم يوم القيامة

المعادلة بمنتهى البساطة

عايز تمشي ع الصراط المستقيم يوم القيامة صح لازم تمشي من دلوقتي صح

خد قرار من دلوقتي انك تمشي صح ثابت

هتمشي ثابت يوم القيامة ان شاء الله



طيب انت عمال تقولنا بإيد ربنا و ربنا بيهدي من يشاء و بقينا دلوقتي نسمع عن فرق كتير الشيعة المعتزلة القرآنيين الصوفيين

ايه الصح ايه الغلط مش عارف أروح فين


طيب ازاي أبقى من اللي ربنا يشاء أن يهديهم ازاي أمشي صح أعرف الحق مع مين ؟؟

أبشر

هو دا اللي انت بتعمله 17 مرة في اليوم

تسأل الله أن تكون على الصراط المستقيم في الدنيا و الآخرة

بتسأل ربنا الهداية حتى و انت مسلم

الهداية انك تفضل على الاسلام

الهداية انك تتعلم تعاليم الإسلام

الهداية ان قلبك يفضل ثابت

الهداية تعرف انت تبع مين و ماشي ازاي

طريقك طريق واحد هو القرآن و ما صح عن النبي صلى الله عليه وسلم

الحل العملي موجود في سورة الفاتحة

أن تسأل من بيده الهداية أن يهديك

عن مطرّف ابن عبد الله ابن الشّخير قال :

" تذكرت ما جماع الخير فإذا الخير كثير: الصوم و الصلاة و إذا هو في يد الله عز و جل و إذا أنت لا تقدر على ما في يد الله عز و جل إلا أن تسأله فيعطيك فإذا جماع الخير الدعاء"

هو حل واحد

عايز حاجة

تسأل من يملكها

و لا يقدر على الهداية إلا الله

أكيد من حسن التعامل مع الله انك ما تبقاش واقف في مقابلة مع الملك و أي ملك ! أعظم ملك و بتسأله النجاة و برضه تبقى واقف سرحان !

عشان كدا في ناس بتصلي كل يوم و محافظة على الصلاة و مع ذلك مفيش أثر الهداية في حياتهم

دا لأن الصلاة تحولت إلى عادة مش حاسس بالقرآن اللي بيقوله

مش فاهم بقى يقول ايه و بقت مجرد روتين في حياته

لازم تسأل و تلح على الله و تتيقن من الإجابة


و قرر ان صلاتك هتختلف من الآن بإذن الله



نسأل الله أن يهدينا و إياكم إلى و على الصراط المستقيم




2 
أحلى دنيا

نسأل الله أن يهدينا و إياكم إلى و على الصراط المستقيم

آمييين جزاكي الله خير ع الموضوع الجميل



Powered by vBulletin® Copyright ©2000 - 2018, Jelsoft Enterprises Ltd.
المواد المنشورة والمكتوبة فى المنتدى لا تُعبر بالضرورة عن وجهة نظر القائمين عليه ولكنها تعبر عن وجهة نظر كاتبها فقط.