"رسوماتى عبارة عن تدوينات شخصية، زى اللى كنا بنعملها زمان فى كشاكيلنا وكراستنا، برسمها عادة فى لحظة روقان لما يجيلى الخاطر أكتب اللى فى الخاطر وبس" .. هكذا وصف لنا إسلام جاويش، ما يقدمه من رسومات كاريكاتيرية ذات طابع خاص على موقع التواصل الإجتماعى "الفيس بوك".

وقال إسلام فى تصريح خاص لـ"منتديات المصطبة": فى رسوماتى بحب أشرح كل اللى بيجى فى دماغى بطريقة بسيطة، بمعنى أصح بقول اللى أنا شايفه وفاهمه فى كل حاجة مش شرط فى مجال معين".

وعن أكثر الموضوعات التى تستفزه ليرسمها قال: "لو لاحظت مشهد معين واستفزنى برسمه بدل ما أكتبه فى استاتيوس، لأنى بميل أكتر إنى أوضحه على الورق زى ما أنا شايفه فى دماغى .. مع العلم إن الورق فعلاً أفضل طريقة لتوصيل الفكرة".

وفيما يتعلق ببساطة رسوماته أوضح جاويش "الطريقة اللى بستخدمها حالياً فى الرسم أسهل، أحلى وأسرع فحبيتها، والناس كمان حبيتها".

وأضاف أيضاً "الموضوع مكنش فى دماغى أصلاً، أنا رفعت رسمتين بالصدفة ولقيت رد الفعل عليهم كويس جداً، فقولت انزل الباقيين بقى وبالفعل الناس حبيتهم جداً".